Trajneri i Juventusit, Luciano Spalletti e ka parasysh se Edon Zhegrova duhet patjetër të ketë minutazhë më të madhe për shkak të karakteristikave të tij në repartin ofensiv.
Mediumet italiane kanë raportuar se Spalletti po e pret kthimin e Zhegrovës në Torino, pasi sulmuesi i krahut është grumbulluar me Kombëtaren e Kosovës për ndeshjet e këtij muaji në kuadër të kualifikimeve për Botërorin 2026.
Spalletti ka besim të madh në aftësitë e Zhegrovës, i cili prejse iu bashkua Juventusit nuk ka pasur shumë minuta për shkak të lëndimit dhe gjendjes së tij fizike.
Deri më tani, Zhegrova në total ka regjistruar 79-të minuta lojë dhe në të gjitha këto ndeshje është inkuadruar nga banka e rezervistëve.
Në ndeshjen e fundit, barazimin pa gola ndaj Torinos, Zhegrova luajti gati gjysmë ore dhe krijoi katër kërcënime për portën kundërshtare.
Kështu që, pas përfundimit të ndeshjeve kualifikuese javën tjetër, Zhegrova pritet të ketë më shumë minuta, në mënyrë që të integrohet plotësisht në përbërjen e parë të skuadrës italiane.
Ai iu bashkua Juventusit nga skuadra e Lillet para fillimit të këtij sezoni për 20 milionë euro.
