Të dielën, Maqedonia e Veriut zgjodhi kryetarët e rinj të komunave.
Në këtë raund të zgjedhjeve lokale Partia në pushtet, VMRO-DPMNE, shpalli fitore.
Ky subjekt, do të ketë kryetarë komunash në 30 nga gjithsej 80 komuna.
Po ashtu VMRO-DPMNE pret që në rundin e dytë të fitojë edhe në rreth 20 të tjera, përfshirë edhe qytetin e Shkupit.
Në këtë proces elektoral, garues ishin edhe shqiptarët.
Por ndarja e shqiptarëve në shumë parti politike atje, vlerësohet se bëri që në komunën shqiptare të Kërçovës të triumfojnë maqedonët në raundin e parë.
Për profesorin Sefer Tahiri, kjo komunë rrezikohet edhe për raundin e dytë pa një marrëveshje në mes shqiptarëve.
Por në këto zgjedhje, shqiptarët fituan për herë të parë komunën e Çashkës.
Për Tahirin, kjo komunë është e vogël për përfaqësim.
E dy blloqet më të përfolura për shqiptarët atje kanë qenë koalicioni VLEN dhe AKI-ja e Ali Ahmetit.
Por profesori Tahiri thotë se të dyja partitë kanë dalë fituese, njëra me kandidat e tjetra me këshilltarë.
Gara më e ashpër në këto zgjedhje ka qenë në komunën e Çairit, në mes koalicionit VLEN dhe AKI-së së Ali Ahmetit.
Këtë komunë e fitoi VLEN-i me kandidatin Izet Mexhiti.
Gjithashtu, VLEN-i e fitoi në raundin e parë komunën e Haracinës, atë të Zhelinit, Sarajit dhe Tearcës.
Ndërsa AKI-ja e fitoi Gostivarin, Likovën, Plasnicën dhe Çashkën.
Komuna e Tetovës mbeti për raundin e dytë në mes të Bilall Kasamit nga VLEN apo Bajram Rexhepi nga AKI.
Raundi i dytë i zgjedhjeve është në 2 nëntor.
