Kryeministri i Kosovës, Albin Kurti, ka bërë të ditur se duke filluar nga sot do të zhvillojë takime me liderët e partive opozitare lidhur me procesin e zgjedhjes së Presidentit të vendit.
Takimin e parë ai do ta mbajë me kryetarin e Lidhjes Demokratike të Kosovës, Lumir Abdixhiku. Ky takim pritet të zhvillohet në orën 11:00 në ambientet e Kuvendit të Kosovës.
Kryeministri Kurti kishte paralajmëruar që të premten se nga dita e hënë do të nisë konsultimet me opozitën për këtë çështje.
Ndërkohë, Gjykata Kushtetuese e Kosovës u ka dhënë deputetëve më shumë se një muaj afat për zgjedhjen e presidentit të ri. Ky vendim erdhi pasi Gjykata rrëzoi më 25 mars dekretin e presidentes Vjosa Osmani për shpërndarjen e Kuvendit, pas dështimit për zgjedhjen e presidentit në seancën e 5 marsit. /teve1.info/
