Një person është arrestuar në Istog nën dyshimin për posedim të substancave psikotrope dhe analoge.
Sipas njoftimit të Policisë, i dyshuari u ndalua gjatë kontrollit të veturës së tij, ku u gjet dhe u sekuestrua kokainë e ndarë në 31 doza të paketuara në qese të vogla. Pas kësaj, njësiti antidrogë kreu bastisje në një dyqan dhe në banesën e tij. Në banesë u gjet edhe një sasi tjetër e substancës së dyshuar narkotike të të njëjtit lloj.
Policia bëri të ditur se janë kontrolluar edhe dollapët që i dyshuari i përdorte në vendin e punës, por aty nuk është gjetur asgjë e dyshimtë. Sasia totale e narkotikëve të konfiskuar arrin në 17.4 gramë.
Në kuadër të këtij rasti janë sekuestruar edhe një veturë, një telefon i tipit iPhone 17 Pro, 3.475 euro para të gatshme dhe një peshore elektronike.
Me urdhër të prokurorit, i dyshuari është ndaluar dhe dërguar në mbajtje për procedura të mëtejme ligjore.
