Deputeti i Lidhjes Demokratike të Kosovës, Armend Zemaj, ka deklaruar se qeveria Kurti i ka zhytur duart thellë në korrupsion edhe pse kishte premtuar qeverisje me duar të pastra.
Sipas Zemaj, Lëvizja Vetëvendosje u ka premtuar parajsë qytetarëve mirëpo përfunduan duke i varfëruar ata.
“Ky pushtet i dështuar po i ikë përgjegjësisë që duhet të japë para qytetarit që i premtoi qeverisje me duar të pastra. Kjo qeveri veç duar të pastra nuk ka. I ka zhytur thellë në korrupsion. Hafizi nuk është ndonjë person i parëndësishëm. Ai është i afërt dhe shumë i afërt me Kurtin, ndërsa Dejona është vetë Kurti. Këta njerëz janë shkurt e shqip struktura kriminale. Si ka mundësi Naser Hafizi me pagë pak mbi 700 euro të blejë katër banesa brenda një viti e të ketë qarkullim mbi 400 mijë euro. Pse një person pa asnjë pozitë në Qeveri vendos kur duhet të ndalet rryma. Kësaj nuk mund t’i themi gjë tjetër veçse skemë e organizuar kriminale. Këta njerëz premtuan parajsë dhe përfunduan duke i varfëruar qytetarët”, ka thënë Zemaj në seancën e jashtëzakonshme të Kuvendit për ambalazhuesit e ujit.
Në Kuvendin e Kosovës po mbahet seancë e jashtëzakonshme e thirrur nga partitë opozitare për të diskutuar për procesin e përllogaritjes së borxheve të kompanive ambalazhuese të ujit, si dhe mënyrën dhe bazën e shlyerjes së borxheve nga Ministria e Mjedisit, Planifikimit Hapësinor dhe Infrastrukturës.
Në këtë seancë nuk janë duke marrë pjesë deputetët e mazhorancës./teve1.info/
Seanca e jashtëzakonshme e Kuvendit për ambalazhuesit e ujit, VV nuk merr pjesë
