Deputeti i LDK-së, Armend Zemaj, ka akuzuar Lëvizjen Vetëvendosje se po e mban “peng” vendin për interesa të pushtetit dhe jo të shtetit.
Në konferencë për media, Zemaj tha se LVV po përdor “manovra të ndryshme” nga frika se mund ta humbasë pushtetin.
Sipas tij, situata politike është zvarritur që nga prilli, kur – siç pretendon ai – shumica parlamentare “nuk i kishte numrat dhe nuk kishte marrëveshje”.
“LVV-ja, nga frika që po e humb pushtetin dhe nga dashuria e madhe vetëm për pushtet, dhe jo për shtet – po e mban peng vendin nga format më të ndryshme. Por, fatmirësisht sot besojmë se në orën 14:00, manovrave të LVV-së do të iu vie fundi, ashtu siç është dashur të ndodh që në prill, kur edhe atëherë nuk i kishin numrat, nuk kishin marrëveshje”, deklaroi ai.
Ai theksoi se Lidhja Demokratike e Kosovës nuk do të bëhet pjesë e “skenarëve populistë dhe krizave të fabrikuara për interesa zgjedhore”. /teve1.info/
