Gjykata Themelore në Prishtinë ka lëshuar urdhërarrest ndaj Milan Radoiçiqit dhe ndaj 10 personave të tjerë.
Urdhri është lëshuar në kuadër të veprimeve hetimore që po ndërmerren në rastin e vendosjes së barrikadave në katër komunat veriore në 2022-n.
Lidhur me këtë, avokati Yll Zekaj, druan se do të jetë e vështirë të sigurohet prezenca e kryeterroristit.
Zekaj thekson sfidat në sigurimin e prezencës së tij përballë drejtësisë, për shkak të përkrahjes së madhe që, sipas tij, ai gëzon nga shteti serb.
“Kjo tregon që gjykatat në Kosovë janë e veprojnë të pavarura. Presim, është e vështirë të sigurohet prezenca e Radojiçiqit, për shkak të përkrahjes së madhe që i jep Serbia. Edhe një herë po konfirmohet që Serbia është parajsë për të gjithë kriminelët. Të gjitha ata që kryejnë vepra penale e të cilët nuk mund të kapen nga vende të ndryshme, sot gjejnë strehim në Serbi. Kapja e tyre mund të bëhet vetëm me një presion politik të vendeve partnere, me të cilat duhet të kontribuojë edhe Kosova”, tha ai në emisionin “Ditari” në Tëvë1.
Sipas Zekajt, kapja e Radojiçiqit dhe e personave të tjerë në arrati është e pamundur pa një ndikim të drejtpërdrejtë politik nga vendet partnere të Kosovës.
“Kapja e tyre mund të bëhet vetëm me një presion politik të vendeve partnere, me të cilat duhet të kontribuojë edhe Kosova,” theksoi ai.
Ai gjithashtu vlerësoi se ndonëse Qeveria e Kosovës ka nisur përpjekje në aspektin ndërkombëtar, ende nuk po shihen rezultate konkrete.
“Është dashur të kemi një ndihmë nga faktori ndërkombëtar, por në kuptimin e bashkëpunimit që po bëhet tani nga Qeveria e Kosovës nuk shohim që mund të kemi edhe shpejtë ndikim e bashkëpunim nga vendet e tjera”, përfundoi Zekaj.
Gjykata Themelore në Prishtinë bëri të ditur se autoritetet po i hetojnë rreth 50 persona për veprat penale “pengim i personit zyrtar në kryerjen e detyrave zyrtare”, “thirrje për rezistencë” dhe “bashkim për veprimtari kundër kushtetuese”. Ndërkohë, Radoiçiq është i dyshuari kryesor për sulmin e shtatorit të 2023-s në Banjska të Zveçanit./teve1.info/
