Misteri që ka shoqëruar për më shumë se gjashtë dekada vdekjen e ikonës së Hollivudit, Marilyn Monroe, mund të ketë një shpjegim krejt tjetër nga ai që është besuar deri më sot.
Sipas një biografie të re, aktorja nuk u vra dhe as nuk i dha fund jetës së saj.
Autori pretendon se Monroe humbi jetën si pasojë e një gabimi mjekësor, duke hedhur poshtë si teoritë e komplotit për vrasje, ashtu edhe versionin zyrtar të vetëvrasjes.
Ylli i filmave të famshëm si Some Like It Hot dhe Gentlemen Prefer Blondes vdiq më 4 gusht 1962 në Los Anxhelos, në moshën 36-vjeçare.
Sipas hetimit zyrtar të kohës, shkaku i vdekjes ishte një mbidozë e kombinimit të dy ilaçeve qetësuese.
Për dekada me radhë, vdekja e saj ka ushqyer teori të shumta, përfshirë edhe pretendimet se ajo ishte eliminuar për shkak të lidhjes së saj të përfolur me presidentin amerikan John F. Kennedy.
Megjithatë, biografi i ri pretendon se përgjegjësia mund të ketë qenë e mjekut të saj personal, Hyman Engelberg, i cili sipas autorit mund të ketë fshehur rolin e tij në tragjedi duke mohuar se i kishte përshkruar një nga medikamentet që rezultuan fatale për aktoren.
Nëse pretendimet e librit rezultojnë të sakta, një nga vdekjet më të famshme dhe më të debatuara në historinë e Hollivudit mund të mos ketë qenë as vrasje dhe as vetëvrasje, por pasojë e neglizhencës mjekësore.
