Ani pse më 1 gusht një gjë e tillë nuk mundi të realizohej për shkak të barrikadave e situatës së tensionuar në veri, kjo masë për dokumentet hyrje/dalje me Serbinë, pritet të fillojë nga 1 shtatori.
Për të gjetur një marrëveshje për këtë çështje, pala kosovare dhe serbe u takuan para ditësh në Bruksel, por takimi ishte pa rezultat. Por presidenti serb Vuçiq, është shprehur optimist se brenda këtyre ditëve do të arrihet një kompromis.
E njohësi i çështjeve politike, Arben Fetoshi pret që nga shtatori të nis zbatimi i reciprociteti.
Madje sipas tij, kësaj radhe nuk do të ketë tensione e as përshkallëzim të situatës.
E sipas njohësit tjetër të çështjeve politike Arbnor Sadiku, në rast se nuk arrihet ndonjë kompromis, bashkësia ndërkombëtare do të tentoj ta shtyej këtë masë.
Sa i përket targave, presidenti serb Vuçiq, ka deklaruar se propozimi i tij ishte që serbët e veriut t’i përdorin targat KS, por sipas tij kryeministri i Kosovës Albin Kurti nuk ka pranuar, duke thënë se të gjitha targat duhet të jenë me RKS. Këtë vendim, Kurti e ka prezantuar edhe me lehtësime për qytetarët që kalojnë për herë të parë në RKS.
Raporti i gazetarit Doresa Geci.
