Deputetja e Lidhjes Demokratike të Kosovës (LDK), Janina Ymeri, ka reaguar pas njoftimit të Korporatës Energjetike të Kosovës (KEK) se Njësia A5 është ndalur për shkak të një rrjedhjeje në sistemin gypor.
Përmes një postimi në Facebook, Ymeri ka theksuar se sanimi i rrjedhjes së ujit për 24 orë do t’i kushtojë Kosovës afër çerek milioni euro.
Ajo ka bërë llogaritje për humbjet që shkakton ndalimi i bllokut, duke shpjeguar se A5 prodhon rreth 125 MWh energji, ndërsa çmimi i energjisë për ditën e nesërme në bursat Alpex dhe Hupx sillet mes 68 dhe 145 euro për MWh, çka sipas saj për 24 orë përkthehet në blerje energjie prej rreth 200 mijë eurosh.
Postimi i plotë
Sanimi i rrjedhjes së ujit në bllok që për 24h kushton afër Çerek Milioni
Blloku A5 ndalet për sanim të rrjedhjeve të ujit.
A5 i jep 125 MWh të paktën sot para se me u ndal.
Me çmimin e Megawatit në bursë Alpex për nesër mesatar është 68 Euro, në bursën Hupx, 145 Euro
Për 24h me anë të bursave, minimalisht 200,000 Euro blerje rryme.
Kështu ikin paratë e ardhmëria jonë përderisa QKUK harrnohet e nuk renovohet ndërsa afrohet dita kur do të na kërkohen paratë për rritjen e 4të e energjisë elektrik
Ndryshe, Korportata Energjetike e Kosovës ka njoftuar se Njësia A5 është ndalur nga operimi për shkak të një rrjedhjeje në sistemin gypor.
Megjithatë në njoftim, KEK-u ka thënë se operimi po vazhdon me katër njësitë e tjera: A3, A4, B1 dhe B2.
