Golden Eagle Ylli do të përballet me skuadrën e Trepçën në gjysmëfinalen e “Final 8” të Kupës së Kosovës në basketball.
Ylli është bë gjysmëfinalisti i dytë, pasi të martën mbrëma e eliminoi skuadrën e Vëllaznimit në çerekfinale.
Skuadra nga Suhareka triumfoi me shifrat 76:58 dhe në gjysmëfinale do të luaj kundër Trepçës, ndeshje që do të luhet kjo të premten.
Skuadra e Yllit e nisi furishëm duelin dhe dallimin e shkëputjen në rezultat e bëri në çerekun e parë.
Këtë periudhë, Ylli e fitoi me shifrat 31:12, epërsi kjo që i mjaftoi ekipit suharekas për ta fituar në fund ndeshjen.
Fundori Alonzo Verge ishte më i dalluari te Ylli, pasi ndeshjen e përfundoi me 18 pikë, 4 kërcime dhe 6 asistime.
Në anën tjetër, te Vëllaznimi më efikasi ishte Jordan Dallas me 14 pikë e 11 kërcime. “Final 8” i Kupës së Kosovës, nisi të martën në Gjakovë.
Para Yllit, në gjysmëfinale u kualifikua edhe Trepça, ekip që e ka fituar këtë trofe në dy edicionet e fundit.
