Në një sport ku kulmi i formës zakonisht vjen në fund të të 20-ave, Nick Baumgartner vazhdon të sfidojë logjikën. Në moshën 44-vjeçare, amerikani do të garojë në Lojërat Olimpike Dimërore Milano-Cortina 2026 me synimin për të thyer sërish rekordin e tij si medalisti më i vjetër në historinë olimpike të snowboard-it.
Sipas vetë Baumgartner, ai nuk është ndonjë “anomali”.
“Do të mendonit se do të lodhesha nga kjo,” thotë ai. “Por e dua po aq sa ditën kur nisa. Ndoshta sepse e fillova snowboard cross-in vetëm në të 20-at dhe po kompensoj kohën e humbur.”
Katër vite më parë në Pekin, Baumgartner ishte pranë lotëve pasi dështoi të kualifikohej në gjysmëfinalet e snowboard cross për meshkuj. Një gabim i vogël, por fatal. Në moshën 40-vjeçare dhe pa asnjë medalje në katër Olimpiada, ai e ndiente kohën që po i mbaronte.
Shpëtimi erdhi nga një disiplinë e re olimpike: snowboard cross-i miks për ekipe. I çiftuar me Lindsey Jacobellis — edhe ajo me histori zhgënjimesh olimpike — Baumgartner arriti më në fund majën e podiumit. Ari i fituar në Pekin 2022 ishte kurorëzimi i një karriere të gjatë dhe të pazakontë.
Baumgartner e pranon se trupi nuk reagon më si dikur. Zgjohet me dhimbje të çuditshme, i duhet më shumë kohë për t’u “ndezur”, dhe flokët gri po shtohen. Stërvitja e tij sot është e gjitha e fokusuar në lëvizje eksplozive dhe “fast-twitch”, për të dalë sa më shpejt nga porta e nisjes, përpara se graviteti dhe eksperienca të bëjnë pjesën tjetër. Çdo parametër monitorohet nga teknologjia për të shmangur mbingarkesën dhe dëmtimet.
“Në moshën 40-vjeçare pata sezonin më të mirë të karrierës,” thotë ai. “Po bëjmë gjithçka që mundemi, duke përdorur çdo teknologji në dispozicion për të qenë më të mirë.”
Në Milano-Cortina 2026, ai do të përpiqet të dëshmojë se mosha është vetëm një numër — dhe se pasioni, përvoja dhe këmbëngulja mund të jenë po aq të forta sa rinia.
