Julia Simon ka shkruar një nga historitë më të pazakonta të Lojërave Olimpike Dimërore 2026. Vetëm katër muaj pasi u shpall fajtore për vjedhje dhe mashtrim me kartë krediti, biatletja franceze fitoi medaljen e artë në garën individuale për femra në Itali, duke kurorëzuar një rikthim të bujshëm në skenën më të madhe të sportit dimëror.
29-vjeçarja triumfoi me kohën 41:15.6, duke shtuar një tjetër trofe në karrierën e saj të pasur, që tashmë përfshin edhe arin në stafetën miks të fituar më herët gjatë kësaj jave në Milano-Cortina. Pas saj u rendit bashkëkombësja Lou Jeanmonnot me medaljen e argjendtë, ndërsa bullgarja Lora Hristova siguroi bronzin.
Presidenti francez Emmanuel Macron reagoi menjëherë me një mesazh urimi për Simon dhe Jeanmonnot, duke përgëzuar suksesin e dy sportisteve franceze.
Simon hyri në qitjen e fundit me kohën e dytë më të mirë në një garë shumë të ngushtë. Por ajo doli prej saj me një avantazh të konsiderueshëm. Liderja e deriatëhershme, gjermania Franziska Preuss, gaboi në dy të shtëna dhe mori një penalizim prej dy minutash, ndërsa austriakja Lisa Hauser, e treta në atë moment, humbi tri objektiva. Simon gaboi vetëm një herë gjatë gjithë garës, duke treguar qetësi dhe saktësi në momentet vendimtare.
Në tetor, një gjykatë franceze e shpalli Simon fajtore për përdorimin e kartës bankare të shoqes së skuadrës Justine Braisaz-Bouchet dhe të një anëtari të stafit të ekipit francez, duke kryer blerje online mbi 2,000 euro. Ajo shmangu burgun, duke marrë një dënim me tre muaj heqje lirie me kusht.
Gjatë gjyqit, Simon kërkoi falje dhe deklaroi se nuk ishte në gjendje të shpjegonte veprimet e saj:
“Unë nuk mund ta shpjegoj. Nuk mbaj mend ta kem bërë. Nuk arrij t’i jap kuptim,” tha ajo.
Federata Franceze e Skive e ndëshkoi me një pezullim gjashtëmujor, por pesë muaj u pezulluan me kusht, duke i hapur rrugën pjesëmarrjes në Lojërat e Milano-Cortina.
Pavarësisht polemikave, Simon mbetet një nga emrat më të suksesshëm të biatlonit në vitet e fundit. Ajo numëron 10 medalje ari në kampionatet botërore, si në gara individuale ashtu edhe në ato ekipore, si dhe një medalje argjendi në stafetën miks në Lojërat Olimpike të Pekinit 2022.
Triumfi në Itali shënon medaljen e saj të parë olimpike individuale të artë — një arritje që, për shumëkënd, do të mbetet po aq e diskutuar sa edhe e lavdishme.
