Edhe dy medalje të tjera Kosova i ka siguruar në Lojërat Mesdhetare në Oran të Algjerisë. Një të artë e një të bronztë.
Medaljen e artë e siguroj Laura Fazliu. Xhudisjta garoi të enjten në kategorinë deri 63 kilogramë dhe kishte një ditë shumë të mirë. Për Kosovën është medalja e dytë e artë, pas asaj të fituar nga Distria Krasniqi.
21-vjeçarja Laura Fazliu ka vazhduar me formë shumë të lartë. Në fund të prillit ajo doli nënkampione e Evropës, ndërsa tani është kampione mesdhetare.
Laura ishte bartësja e tretë, ndërsa në finale e mposhti bartësen e parë, spanjollen Cristina Cabana Perez.
Ndaj saj fitoi me Waza-ari në kohën shtesë. Lufta ishte e fortë, por Laura vazhdimisht ka kërkuar hedhjen.
Laura e nisi ditën me fitore ndaj kroates, Iva Oberan. Ndaj saj fitoi me “Waza-ari”, në çerekfinale. Në gjysmëfinale e mposhti xhudisten algjeriane, Amina Belkadi. Edhe ndaj Belkadit, që kishte përkrahje të madhe nga shikuesit, realizoi aksion për “Waza-ari”.
Laura ka shfaqur më shumë në të dy luftërat e para, duke mos u rrezikuar thuajse asnjëherë. Spanjollen Cabana, Laura e kishte mposhtur edhe në gjysmëfinale të Evropianit në Sofje.
E në listën e medalistëve hyri edhe xhudisti Akil Gjakova. Xhudisti 26-vjeçar ka fituar medaljen e bronztë në kategorinë deri 73 kilogramë.
Kampioni evropian nga viti i kaluar, ishte bartës i parë në kategori. Por në fund u rendit i treti. Si bartës i parë, Akili në xhiron e parë ishte i lirë.
Në çerekfinale e mposhti grekun Michail Tsoutlasvili. Ndaj tij fitoi me Ippon, përkatësisht me hedhje të bukur.
Në gjysmëfinale, Akil Gjakova u përball me xhudistin vendas, algjerianin Messaoud Redouane Dris. Lufta ishte e fortë dhe shkoi në kohën shtesë, ndërsa algjeriani kishte përkrahje të madhe të shikuesve. Në kohën shtesë, Gjakova pati telashe për të kontrolluar luftën dhe Dris realizoi aksion për fitore.
Për vend të tretë, Akil Gjakova e mposhti italianin Manuel Lombardo. Ndaj tij fitoi me shumë mund. Sërish Akili kishte telashe për të shfaqur më të mirën, por megjithatë realizoi aksion për fitore.
Për Akilin është medalja e parë që nga Evropiani i vitit të kaluar. Në Evropian, Gjakova ishte kampion.
