Superliga e Kosovës vazhdon këtë fundjavë me xhiron e dytë e cila hapet në Rahovec, ku Rahoveci 029 do të zhvillojë ndeshjen e dytë radhazi para publikut vendas. Pas përballjes me Trepçën në javën e parë, rahovecasit kësaj radhe presin Bashkimin, që e nisi edicionin e ri me një fitore bindëse ndaj Golden Eagle Yllit.
Mbrëmja e së shtunës sjell edhe një nga përballjet tradicionale të basketbollit kosovar, atë ndërmjet Trepçës dhe Pejës. Për kampionët aktualë kjo do të jetë ndeshja e parë në “Minatori” në edicionin e ri. Për Pejën, ndërkaq, do të jetë paraqitja e parë në parket këtë sezon, pasi ndeshja e javës së parë ndaj Sigal Prishtinës nuk u zhvillua.
Të dielën, vëmendja fillimisht zhvendoset në Gjakovë, ku Vëllaznimi pret Sigal Prishtinën në palestrën “Shani Nushi” nga ora 17:00. Kuqezinjtë do të synojnë të reagojnë para tifozëve të tyre pas humbjes ndaj Borës në xhiron e parë. Në anën tjetër, kjo do të jetë ndeshja e parë e Sigal Prishtinës në edicionin e ri.
Xhiron e mbyll përballja Golden Eagle Ylli – Bora, të dielën nga ora 19:00 në palestrën “13 Qershori”. Një duel që pritet të jetë mjaft interesant, duke marrë parasysh synimet e të dyja skuadrave në këtë edicion.
Orari i Xhiros II:
E shtunë
17:00 | Rahoveci 029 – Bashkimi
19:00 | Trepça – Peja
E diel
17:00 | Vëllaznimi – Sigal Prishtina
19:00 | Golden Eagle Ylli – Bora
