Sot zhvillohen dy ndeshje interesante në elitën e basketbollit kosovar.
Këto duele i takojnë xhiros së 15-të të Superligës së Kosovës në basketboll.
Një duel interesant do të zhvillohet në Gjakovë, aty ku skuadra e Vëllaznimit do t’i bëjë konak skuadrës së Bashkimit.
Dy ekipet do të mundohen të marrin pikë të plota nga ky takim: Bashkimi për të ndjekur kreun, ndërsa Vëllaznimi për t’iu ikur pozitave të poshtme.
Në xhiron e shkuar, gjakovarët pikërisht në këtë palestër e mposhtën Pejën, ndërsa prizrenasit pësuan humbje në udhëtim te Bora.
Sa i përket rosterëve, te Vëllaznimi pritet të mungojë Colimerio, i lënduar, ndërsa te Bashkimi është e konfirmuar mungesa e Kayn Anderson.
Vëllaznimi ndodhet në pozitën e shtatë tabelare me 19 pikë të mbledhura, ndërsa Bashkimi renditet i dyti me 23 pikë.
Dueli tjetër i ditës zhvillohet në kryeqytet, saktësisht në palestrën “1 Tetori”, ku do të përballen Bora dhe Rahoveci.
Bora vjen tepër e motivuar në këtë duel, pasi në xhiron e fundit e befasoi Bashkimin, ndërsa Rahoveci, i drejtuar nga Bujar Loci, vjen pas humbjes ndaj Yllit.
Të dy trajnerët pritet t’i kenë të gjithë lojtarët në dispozicion për këtë takim.
Bora renditet e pesta në tabelë me 20 pikë të grumbulluara, teksa Rahoveci zë vendin e fundit me vetëm një pikë më pak.
Të dy takimet fillojnë nga ora 18:45 dhe mund t’i ndiqni drejtpërdrejt në platformën “Telkos”.
