Mesfushori kosovar që luan për Arsenalin, Granit Xhaka, i akuzoi bashkëlojëtarët e tij për humbjen e pësuar të hënën mbrëma nga Newcastle Unitedi.
“Topçinjtë” humbën si mysafirë 2:0, ndërsa Xhaka u shpreh pas lojës se paraqitja ishte katastrofike.
“Është e vështirë t’i gjesh fjalët e duhura, nga minuta e parë deri në të 90-n nuk e meritonim të ishim në fushë. Nuk kam shpjegim. Nuk e bëmë atë që duhej, nuk e dëgjuam trajnerin. Ishte paraqitje katastrofike. Nuk e meritojnë (bashkëlojtarët v.j), të luajnë në Champions League apo në Europa League. Nuk e di pse nuk po e bëjmë atë që kërkon trajneri nga ne”, u shpreh Xhaka.
Për bashkëlojtarët e tij, 29-vjeçari tha se nëse janë nervozë, duhet të qëndrojnë në stol ose në shtëpi.
“Është një nga ndeshjet më të rëndësishme për ne. Po ndihemi shumë të zhgënjyer për njerëzit që erdhën këtu. Më vjen keq për tifozët”, tha tutje ai.
Me këtë disfatë, Arsenali renditet i pesti në tabelën e Premier Leagues, me 66 pikë të tubuara, derisa ka mbetur vetëm edhe një ndeshje pa u zhvilluar.
I katërti renditet Tottenhami me 68 pikë. Katër vendet e para kualifikohen në Ligën e Kampionëve.
