Gjashtë deputetë të Lidhjes Demokratike të Kosovës e kanë kundërshtuar publikisht kandidaturën e Bekim Sejdiut për president të ri të Kosovës, duke e lëkundur marrëveshjen me Lëvizjen Vetëvendosje, të arritur të hënën.
E, analisti politik Visar Xani ka vlerësuar se Ukë Rugova është i vetmi kandidat për president që do të mund t’i siguronte votat e të 18 deputetëve të Lidhjes Demokratike të Kosovës.
Sipas Xanit, nuk ka kandidat tjetër që do të mund t’i bënte bashkë dy grupet e ndara brenda LDK-së.
“Për president, votën unike të LDK-së veç një kandidat mundet me e marrë. Asnjë kandidat tjetër, as nga VV-ja, as nga LDK-ja, me një përjashtim. Vetëm Ukë Rugova mundet me i marrë votat e dy palëve të LDK-së. Kush mundet me i bë bashkë grupet dhe si mundet LDK-ja me votu për një kandidat në mënyrë unanime? Ai është Ukë Rugova. Nuk ka kandidat tjetër, prej të parit deri te i fundit, qoftë deputet i LDK-së apo anëtar i LDK-së, që mund t’i marrë 18 votat e LDK-së”, ka deklaruar Xani në emisionin “Këndi i Debatit” në Tëvë1.
Ndryshe, gjashtë deputetët e zgjedhur të LDK-së që kundërshtuan marrëveshjen e arritur mes Lëvizjes Vetëvendosje (LVV) dhe Lidhjes Demokratike të Kosovës (LDK) për zgjedhjen e presidentit të ardhshëm të Kosovës janë: Avdullah Hoti, Hykmete Bajrami, Kujtim Shala, Arben Gashi, Armend Zemaj dhe Janina Ymeri.
Të gjithë janë arsyetuar se vota e tyre është kundër bashkëpunimit me LVV-në dhe “zgjatjen e pushtetit” të Kurtit.
Pavarësisht kundërshtisë nga gjashtë deputetë, kreu i LVV-së, Albin Kurti, tha se marrëveshja me partinë e Lumir Abdixhikut qëndron dhe është e vlefshme.
LVV-ja ka 53 mandate, ndërsa LDK-ja aktualisht, sipas Abdixhikut, ka vetëm 12 deputetë që e mbështesin Sejdiun për president.
Nëse llogariten edhe pakicat joserbe – me të cilat Kurti bëri Qeverinë e kaluar – sërish nuk arrihet kuorumi që Sejdiu të bëhet presidenti i gjashtë i Kosovës që nga pavarësia.
Dështimi i zgjedhjes së presidentit brenda afatit kushtetues 60-ditor e çon vendin në zgjedhje të reja./teve1.info/
