Sipas Xanit, nëse Qeveria Kurti merr vendime të njëanshme, do ketë pasoja në sigurinë e vendit.
“Nëse kryeministri Kurti e ka marrë këtë vendim pa mbështetjen e partnerëve ndërkombëtarë, konsideroj që është një vendim shumë i rrezikshëm për Kosovën, po ashtu nuk do i bëjë dobi as procesit të dialogut. Nëse marrim vendime të njëanshme, mund të bëjmë gabime të pakthyeshme, gabime të cilat mund të kushtojnë në vetëformimin e Kosovës, mund të ketë kriza fatale për sigurinë në vend”, deklaroi Xani në emisionin “Ditari”.
Ndërkaq, i pyetur se si mund ta pësonte politikisht Kosova këtë refuzim të një propozimi nga SHBA-ja, Xani tha se nuk do ishte aspak e mirë humbja e mbështetjes strategjike nga partnerët e rëndësishëm e të fuqishëm.
“Por, përsëri nuk mund të themi që është diçka e palëkundur raporti mes Kosovës dhe Shteteve të Bashkuara të Amerikës, pra duhet pasur kujdes. Por, përtej këtij veprimi mund të ketë krisje apo ftohje të raporteve”, shtoi tutje Xani në Tëvë1.
Sipas plani të ri të Qeverisë së Kosovës, për tri javë duke filluar nga data 1 nëntor deri në datën 21 nëntor masa do të jetë ajo e qortimit, pastaj nga 21 nëntori deri më 21 janar do të jetë masa e gjobitjes dhe më pastaj nga 21 janari do të kemi targa provuese për dy muaj të tjerë, pas së cilës datës më 21 prill nuk mund të ketë sepse nuk mund të lejohen targa të tjera në Kosovë.
Teksa, nga Qeveria kanë thënë se ky proces ka për synim ligjshmërinë e shtetit të Kosovës, rritjen e sigurisë në trafik dhe nuk është e drejtuar ndaj asnjë etnie të caktuar./Teve1.info.
