Lëvizja Vetëvendosje, dega në Mitrovicë, ka shpallur zgjedhjet e brendshme për përzgjedhjen e kandidatëve për deputetë, duke hapur afatin për aplikim për të gjithë anëtarët e saj.
Sipas njoftimit zyrtar, anëtarët kanë në dispozicion tri ditë për të paraqitur kandidaturat e tyre, konkretisht nga 4 maji deri më 7 maj 2026.
“Afati për pranimin e kandidaturave dhe grumbullimin e nënshkrimeve nga kandidatët është nga data 04.05.2026 deri më datë 07.05.2026”, thuhet në njoftim.
Nga kjo degë bëhet e ditur se çdo anëtar i qendrës ka të drejtë të kandidojë, në përputhje me statutin e subjektit politik.
“Sipas Statutit të Lëvizjes VETËVENDOSJE!, secili anëtar i Qendrës ka të drejtë të kandidojë për deputet”, theksohet më tej.
Kandidatët që synojnë të garojnë duhet të dorëzojnë një sërë dokumentesh të nevojshme për aplikim.
“Kandidatët fillimisht duhet të plotësojnë dhe të dorëzojnë deklaratën e kandidaturës, kopjen e letërnjoftimit, kopjen e kartelës së anëtarësisë si dhe listën me nënshkrime”, thuhet në njoftim.
Po ashtu, çdo kandidat që tërheq formularin e kandidaturës, do të pajiset edhe me listën e kritereve për vlerësim.
Nga dega në Mitrovicë bëhet e ditur se të gjitha dokumentet përkatëse mund të sigurohen në zyrën e subjektit në këtë qytet.
“Këto forma të dokumenteve i gjeni në zyrën e Lëvizjes VETËVENDOSJE! në Mitrovicë”, përfundon njoftimi.
