Kandidati i PDK-së për deputet, Zenun Pajaziti ka thënë se nuk e beson kurrë që Lëvizja Vetëvendosje do t’i fitojë zgjedhjet e 9 shkurtit.
Ai tha se është i sigurt që qytetarët do të reflektojnë dhe do të ndryshohet kjo qeverisje.
Tutje, ai tha se 500 mijë vota në këto zgjedhje për LVV-në janë vetëm një ëndërr e parealizueshme.
“Ky vend nuk kthehet më në diktaturë. Jam i sigurt që qytetarët kanë me reflektu në ndryshimin e kësaj qeverisje dhe kanë me ndryshu Qeverinë. Mund të jetë një ëndërr e parealizueshme, por nuk do të këtë më ashtu. Mendoj që edhe kjo shpikja e këtyre pengesave me pakicat e me Listën Serbe nuk i shpëton dot nga humbja. LVV nuk do të mund të krijojë një Qeveri”, ka deklaruar ai në emisionin “Info Nata” në Tëvë1.
Ai tha se PDK me programin e Bedri Hamzës do të jetë fituese.
“Qytetarët kanë disponim për ndryshime. PDK nuk e ka asnjë version, vetëm atë të fitores së Hamzës. Kemi hyrë në një projekt fitues dhe e presim rezultatin. Nuk shohim që programi i Hamzës të jetë diçka i ngjashëm më këta në pushtet, prandaj nuk shohim ndonjë alternative tjetër”, ka deklaruar ai.
VV-ja në zgjedhjet e 9 shkurtit po i kërkon 500 mijë vota.
Ministrja e Drejtësisë, Albulena Haxhiu, ka shkruar se 500 mijë vota është pragu për pavarësi nga Lista Serbe dhe elita e vjetër e korruptuar.
“500 mijë vota është pragu për pavarësi nga Lista serbe e elita e vjetër e korruptuar. Është fuqia për të vazhduar reformën tonë të thellë përpara. Vazhdojmë garën për 500k vota”, ka shkruar ajo.
