Profesori Nexhmedin Spahiu ka komentuar situatën politike pas zgjedhjeve dhe diskutimet për një bashkëpunim të mundshëm ndërmjet Lëvizjes Vetëvendosje dhe Lidhjes Demokratike të Kosovës për formimin e institucioneve.
Në emisionin “Këndi i Debatit” në Tëvë1, Spahiu tha se mosnisja e takimeve mes LVV-së dhe LDK-së nuk është e rastësishme, duke pretenduar se ekziston një marrëveshje e heshtur mes LVV-së dhe Partisë Demokratike të Kosovës për ta dobësuar LDK-në.
“E dëgjova pak më herët që u tha se është tendencë e LVV-së për ta shkatërruar LDK-në, por unë mendoj që ka një marrëveshje të heshtur mes LVV-së dhe PDK-së për ta shkatërruar LDK-në, të dyja bashkë”, ka deklaruar Spahiu.
Sipas tij, megjithëse LVV-ja dhe PDK-ja kanë dallime të mëdha politike, ato mund të kenë interes të përbashkët kur bëhet fjalë për pozitën e LDK-së në skenën politike.
“Këta të dy për gjëra të mira nuk mund të merren vesh, ndoshta LVV-ja dhe PDK-ja, por për ta dobësuar kundërshtarin e përbashkët edhe mund të bëhen bashkë”, u shpreh ai.
Spahiu shtoi se, sipas tij, edhe PDK-ja po përpiqet ta afrojë LDK-në dhe ta vendosë në një pozitë vartëse, por theksoi se e ardhmja e kësaj partie do të varet nga zhvillimet e brendshme dhe vendimet që do të marrë vetë LDK-ja.
