Në mbledhjen e së hënës, u mor vendimi për moscertifikimin e Listës Serbe për pjesëmarrje në zgjedhjet e 9 shkurtit.
Mirëpo vetëm dy ditë pas, ky vendim i Komisionit Qendror Zgjedhor u anulua nga Paneli Zgjedhor për Ankesa dhe Parashtresa.
Sipas vendimit, urdhërohet KQZ-ja që ta certifikojë këtë subjekt politik, mirëpo mund edhe t’a ankimojë në Gjykatë Supreme.
E zëdhënësi i KQZ-së, tregon se janë në pritje të përfundimit të afateve ligjore për ta futur në rend dite certifikimin e Listës Serbe për pjesëmarrje në zgjedhjet parlamentare të 9 shkurtit 2025, pas vendimit të PZAP-së.
E anëtari që përfaqëson partinë në pushtet në KQZ, Sami Kurteshi thotë se nuk do të ankohen në Supreme për këtë vendim.
“KQZ-ja realisht nuk ka ndonjë arsye me kundërshtu vendimin e PZAP-së. Në rastin më të mirë në kemi votuar kundër ne jemi subjekti me me interes juridik por ne mendojmë që nuk duhet të ankohemi për arsye se Gjykata Supreme mbanë të njëjtin qëndrim, qëndrimi është sipas parimit të vjetër ‘me letra është gjithçka në rregull’”, ka thënë Kurteshi.
Sipas tij, mund të certifikohet Lista Serbe pas vendimit të PZAP-së, mirëpo qëndrimi i tyre vazhdon të jetë i njëjtë.
“Ajo vazhdon dhe do të ishte shumë e rrezikshme nëse miratohen veprimet e tyre ata nuk kanë hequr kurrë dorë nga dhuna, nuk e pranojnë Republikën e Kosovës, ata e konsiderojnë Kosovën si pjesë të Serbisë, ashtu siç e konsideron kushtetuta serbe me emërtimin e njëjëtë ‘Kosovo metohija’ dhe si pjesë e Serbisë dhe thonë se kjo është një terminologji që e përdorë… Mundet me u certifiku Lista Serbe mirëpo jo me votën tonë”, shprehet Kurteshi.
Ndryshe, gjatë së enjtes, u planifikua mbajtja e mbledhjes së rregullt të KQZ-së, mirëpo në mungesë të kuorumit, e njëjta u shty për një datë tjetër.
