I konsideron të dyja shtetet si partnere serioze.
Presidenti serb, Aleksandar Vuçiq, gjatë së mërkurës zhvilloi takime me ambasadorët e Kinës dhe Rusisë.
I pari i Serbisë fillimisht u takua me ambasadorin e Federatës Ruse, Aleksandar Bocan-Kharchenko.
Këtij të fundit, Vuçiq iu ankua duke i thënë se Serbia është në pozitë të vështirë, prandaj po kërkon një seancë të Këshillit të Sigurimit të OKB-së për të informuar publikun për siç thotë ai diskriminimin që po ua bënë Kosova komunitetit serb.
“E informova ambasadorin e Federatës Ruse, Bochan-Kharchenko, për dhunën politike, juridike dhe fizike të ushtruar nga Prishtina ndaj serbëve në Kosovë dhe deklarova se Serbia u gjend në një situatë jashtëzakonisht të vështirë. Pikërisht për këtë Republika e Serbisë do të kërkojë një seancë të Këshillit të Sigurimit të OKB-së për të informuar të gjithë publikun global”, ka thënë Vuçiq.
Kërkesën e njëjtë Vuçiq ia përsëriti edhe Ambasadores Kineze në Beograd, Chen Bo, dhe e falënderoi Kinën për bashkëpunimin e ngushtë që ka me Serbinë.
E Publicisti, Dushan Janjiq, thotë se Vuçiq po i bënë këto veprime që të ketë një pozitë më të fortë në dialog me Kosovën.
Sipas tij, Rusia do ta mirëpres këtë kërkesë të Presidentit serb që të mbajë një seancë në kuadër të Këshillit të Sigurimit.
“Aleksandar Vuçiq po kërkon që Serbia ta ketë një pozitë të fortë në negociata me Kosovën, prandaj po i zhvillon këto takime me ambasadorët e Kinës dhe Federatës Ruse. Ai po kërkon një përfshirje më të madhe nga Kina dhe Rusia ne këto procese, prandaj edhe i mban vazhdimisht të informuara për situatën në Kosovë” , deklaroi Janjiq.
Kurse analisti politik, Tomorr Avdia, thotë se Presidenti serb, Aleksandar Vuçiq po kërkon ta zhvendos vëmendjen nga procesi i dialogut me Kosovën, prandaj edhe po i ndërmerr këto veprime.
Pas tensioneve të larta në veriun e Kosovës, javën e ardhshme pritet të vazhdoj procesi i dialogut mes Kosovës dhe Serbisë ndërmjetësuar nga Brukseli.
Kronika e realizuar nga gazetari Shpat Blakçori.
