Presidenti i Serbisë, Aleksandar Vuçiq, në një intervistë për “TV Happy”, ka thënë se ai nuk do ta nënshkruaj “kapitullimin e Serbisë”.
“Le ta dinë të gjithë. S’mund të ndodhë kurrë që unë ta nënshkruaj kapitullimin e Serbisë”, u shpreh ai.
Njëherit, Vuçiq ka thënë se Serbia s’do të pajtohet që Kosova të hyjë në OKB dhe se nuk do ketë njohje ndaj saj.
“Jemi të gatshëm të bëjmë kompromise, por shqiptarët s’duan të bëjnë asgjë. Serbia është aktere serioze dhe luan fer”, ka thënë ai.
Vuçiqi ka komentuar deklaratat e kryeministrit të Kosovës, Albin Kurti, dhe emisarit të Bashkimit Evropian, Miroslav Lajçak, pas takimit që patën në Prishtinë. Sipas tij, ka pak progres.
“Jam gati i sigurt që Kurti nuk dëshiron ta formojë Asociacionin e komunave me shumicë serbe. Dhe ne nuk kemi asgjë kundër liberalizimit të vizave për Kosovën. Serbia s’ka asgjë kundër, por Perëndimi nuk është i gatshëm t’i bëj presion Kurtit”, ka thënë Vuçiqi, duke shtuar se Perëndimi “po e inkurajon Kurtin për mospërmbushjen e obligimeve”.
Vuçiq po ashtu ka thënë se qëndrimin e tij ua ka bërë të qartë edhe zyrtarëve ndërkombëtarë.
“Njerëzit në Serbi duhet të dinë se askush nga lidershipi i shtetit s’ka shkruar ndonjë plan apo propozim. Është shkruar nga fuqitë perëndimore, Gjermania e Franca. E di çdo detaj dhe duhet të mbesim në bisedime, por s’do të ketë kapitullim apo dorëzim, s’do të ketë njohje të Kosovës”, ka thënë ai, shkruan “Danas”.
