Presidenti i Serbisë, Aleksandar Vuçiq ka thënë se Kurti do të përpiqet ta diskreditojë Listën Serbe, partia që ka mbështetjen më të madhe të serbëve të Kosovës dhe e cila është e afërt me Vuçiqin.
Zgjedhjet lokale në Kosovë do të mbahen më 12 tetor, ndërsa Vuçiq ka kritikuar dhe bashkësinë ndërkombëtare për siç ka thënë ai ka lejuar kryetarët shqiptarë me 2 apo 3 përqind të votave të udhëheqin komunat.
“Kurti do të përpiqet sërish ta diskreditojë Listën Serbe dhe t’i imponojë përfaqësuesit e tij shqiptarë, të cilët nuk mund t’i marrin as dy apo tre për qind të votave. Megjithatë, edhe me ata, bashkësia ndërkombëtare deri tani ia ka mundësuar të qeverisë me komunat me shumicë serbe në Kosovë. Ne do t’i vazhdojmë aktivitetet tona dhe nesër do t’i njoftoj për këtë disa nga përfaqësuesit më të rëndësishëm të botës dhe Evropës, me të cilët do të bisedoj në telefon,” ka deklaruar Vuçiq, pas mbledhjes së Këshillit të Sigurisë Kombëtare të Serbisë i cili është mbajtur pas dënimit me burgim të Millorad Dodikut, presidentit të Republikës Sërpska, entitet serb i Bosnje-Hercegovinës.
Në katër komunat në veri të Kosovës të banuara me shumicë serbe, kryetarët janë shqiptarë. Kjo pas vendimit të serbëve për tu tërhequr nga institucionet e Kosovës në nëntor të vitit 2022.
Në zgjedhjet e jashtëzakonshme të organizuar nga institucionet e Kosovës, partitë politike serbe, por edhe qytetarët serbë kishin bojkotuar procesin zgjedhor.
