Janë në një aktakuzë të përbashkët.
Për pesëshen, Dragan Cvetkoviq, Dragan Niciq, Milosh Shoshiq, Nenad Stojanoviq dhe Slobodan Jevtiq, po bëhen përgatitjet e fundit për fillimin e gjykimit për krime lufte.
Ata akuzohen se në bashkëkryerje dhe me pjesëtarë të tjerë të paidentifikuar, të armatosur e të uniformuar, më 5 maj 1999, kishin ndërmarrë një aksion në disa fshatra të Gjilanit, ku ishin vrarë tetë civilë shqiptarë.
“Për shkak të veprës penale “krim i luftës kundër popullsisë civile në bashkëkryerje”. I akuzuari, Millosh Shoshiq, për shkak edhe të veprës penale “armëmbajtje pa leje”, ka thënë Rrahman Beqiri – kryetar i trupit gjykues
Sipas dosjes së prokurorisë, përpara vrasjes së tetë civilëve, ndaj tyre fillimisht ishte ushtruar dhunë e maltretim me mjete të ndryshme, derisa në fund ndaj tyre ishte shtënë me armë zjarri.
Për gjithë pretendimet e prokurorisë, planifikohet të dëshmojnë 19 dëshmitarë nga ana e organit akuzues.
Por, ndaj Cvetkoviq, Niciq, Shoshiq, Stojanoviq e Jetviq, do të dëshmojnë edhe vet të dëmtuarit.
“Behxhet Mehmeti, Nazmi Hajdini dhe Menderes Ramushi. Këta të tre janë të dëmtuar, por njëkohësisht edhe si dëshmitarë, të cilët do të spjegojnë situatën para këtij trupi gjykues, atë se çfarë kanë përjetuar”, tha Atdhe Dema – prokuror special.
Si të rëndësishme dëshminë e tyre, e vlerësuan edhe mbrojtja e të akuzuarve.
“Kërkojmë që të dëgjohen të gjithë deshmitarët dhe të dëmtuarit. Pasi ne nuk kemi marrë pjesë në marrjen në pyetje të asnjë dëshmitari, prandaj kemi çështje për të cilat dëshmitarët duhet t’i pyesim”, deklaroi Jovana Filipoviq –avokate e Dragan Cvetkoviq.
Edhe këta, do të thërrasin një numër të konsiderueshëm të dëshmitarëve.
“Ne e kemi bërë një liste të dëshmitarëve që do të propozojmë që të dëgjohen në shqyrtimin gjyqësor. Propozojmë që të dëgjohen 20 dëshmitarë të mbrojtjes”, tha Filipoviq.
Në shqyrtimin fillestar, pesë të akuzuarit ishin deklaruar të pafajshëm.
Kurse, shqyrtimi kryesor në këtë rast penal, do të fillojë në muajin nëntor të këtij viti.
