Policia e Kosovës, përmes Drejtorisë për Bashkëpunim Ndërkombëtar Policor dhe në koordinim me njësitet tjera relevante dhe institucionet e drejtësisë, ka kryer me sukses dy ekstradime të personave të kërkuar nga drejtësia ndërkombëtare.
Sipas njoftimit zyrtar, më 7 prill është ekstraduar nga Gjermania në Kosovë shtetasi kosovar me inicialet I.A., i cili kërkohej nga institucionet e drejtësisë së Kosovës.
Ndërsa më 8 prill, është ekstraduar nga Kosova në Shqipëri shtetasi kosovar me inicialet N.C., i kërkuar nga institucionet e drejtësisë shqiptare.
I dyshuari është dorëzuar autoriteteve policore shqiptare në pikëkalimin kufitar në Vermicë.
