Kombëtarja e Kosovës në volejboll në të dyja konkurrencat ka mësuar kundërshtarët për kualifikimet e “CEV EuroVolley 2026”, ka njoftuar të mërkurën Federata e Volejbollit të Kosovës (FVK).
Volejbollistët e Kosovës në këto kualifikime do të jenë në grup me Sllovakinë dhe Letoninë. “Dardanët” do t’i luajnë dy ndeshje këtë vit dhe dy të tjera në vitin e ardhshëm. Më 17/18 gusht të këtij viti, Kosova në Prishtinë do të përballet me Letoninë kurse dhjetë ditë më vonë do të luaj në udhëtim kundër Sllovakisë.
Ndërkohë, volejbollistet janë në një grup me Kroacinë dhe Rumaninë. Ndeshjen e parë të këtij viti, Kosova e luan në shtëpi kundër Kroacisë (17/18 gusht) kurse të dytën e ka në udhëtim ndaj Rumanisë (28/29 gusht). Sikurse volejbollistët edhe volejbollistet dy ndeshjet tjera kualifikuese do t’i luajnë në gusht të vitit 2025.
“FVK u uron shumë suksese ekipeve tona Kombëtare, duke kontribuar direkt në mbështetjen e grumbullimeve dhe çdo formë tjetër, që ekipet tona ta kenë paraqitjen sa më dinjitoze”, ka shkruar Federata e Volejbollit të Kosovës.
