Reprezentuesi i Kosovës, Mërgim Vojvoda edhe edicionin e ardhshëm do të jetë pjesë e skuadrës së Torinos, që bën gara në Serie A.
Mediumet italiane kanë shkruar të martën se te Torino po llogaritin në Vojvodën edhe pas përfundimit të edicionit aktual.
Mësohet se Vojvoda nuk është në listën e lojtarëve që do të largohen këtë verë, pasi te klubi italian janë të kënaqur me paraqitjet e tij.
Në fakt, te Torino janë të gatshëm t’ia ofrojnë Vojvodës rinovimin e kontratës që i skadon në vitin e ardhshëm. 29-vjeçari këtë edicion ka shënuar 1 gol dhe ka bërë 4 asistime në 26 paraqitje për Torinon në të gjitha garat. Vojvoda është pjesë e Torinos prej verës së vitit 2020 kur iu bashkua nga Standardi i Belgjikës.
Aktualisht, Torino është në pozitën e dhjetë në Serie A, ku pas 34 xhirove ka tubuar 46 pikë duke u konfirmuar se edhe edicionin tjetër do të jetë pjesë e elitës së futbollit të Italisë.
