Sipas saj, deklarata e Albin Kurtit, se mund të këtë luftë pas zhvillimeve në veri, kanë shkaktuar shumë panik, huti e paqartësi.
Ajo thotë se ata që kanë dashur t’i bashkohen luftës çlirimtare kanë qenë mjaftueshëm të rritur për ta bërë një gjë të tillë.
“Ka qenë një deklaratë e cila ka shkaktuar shumë panik, shumë huti, shumë paqartësi. Një kryeministër, nëse është serioz në atë çfarë thotë, kur bën paralajmërime për luftë, nuk i bën ato nga plazhet e Greqisë e as nga koncertet. Kur ka paralajmërime serioze për luftë, kryeministri fton mobilizim, i drejtohet popullit, i drejtohet qytetarëve dhe e sqaron situatën”, ka thënë Çitaku për Ekonomia Online.
Çitaku ka thënë se kryeministri duhet të jetë më i kujdesshëm në deklarimin publik.
“Lufta në Kosovë ka përfunduar 23 vite më parë. Disa prej nesh kemi qenë të rritur mjaftueshëm në atë kohë dhe ata që kanë dashur të luftojnë dhe kanë mundur të luftojnë i janë bashkuar luftës çlirimtare. Kryeministri ka trashëguar një Kosovë në paqe, të pavarur dhe sovrane. Sigurisht, me sfida sepse as Roma nuk është ndërtuar për një ditë. Mirëpo, kryeministri duhet të jetë më i matur, më i kujdesshëm në adresimin publik. Nuk duhet të krijojë panik. Nëse ka paralajmërime, kryeministri Kurti duhet t’i bëjë publike ato, t’i denoncojë ato”, ka deklaruar ajo.
“Ne kemi NATO-n në Kosovë, e cila ka mandat që të ruajë paqen dhe sigurinë e integritetin territorial të vendit. Është e qartë që ne kemi sfida në veri, me struktura kriminale, që janë drejtpërdrejt të sponsorizuara nga Beogradi dhe Qeveria atje. Sigurisht që duhet a bëjmë pjesën tonë të punës, që ato struktura t’i shpërbëjmë dhe rendi dhe ligji të mbizotërojë në tërë territorin e Republikës së Kosovës. Mirëpo, fjala publike ka peshë, sidomos kur vjen nga një kryeministër”, ka thënë Çitaku.
