Ish-presidentja e Kosovës, Vjosa Osmani, ka shprehur mbështetje për protestën e studentëve shqiptarë në Maqedoninë e Veriut, të cilët po kundërshtojnë mosmbajtjen e provimit të Jurisprudencës në gjuhën shqipe.
Osmani publikoi pankartën e protestës me mesazhin: “Gjuha shqipe është e shenjtë! Ngrihu në mbrojtje të saj!”.
Protesta pritet të mbahet sot në Shkup, ku do të marrin pjesë studentë nga Maqedonia e Veriut, Kosova, Shqipëria dhe treva të tjera shqiptare. Ata po kërkojnë që provimi i Jurisprudencës të organizohet edhe në gjuhën shqipe, duke theksuar se shqipja është gjuhë zyrtare në vend dhe duhet të trajtohet në mënyrë të barabartë.
Organizatorët kanë bërë thirrje për pjesëmarrje sa më të madhe, duke e cilësuar mbrojtjen e përdorimit të gjuhës shqipe në institucionet dhe proceset profesionale si çështje të dinjitetit dhe barazisë.
Protesta do të zhvillohet me moton “Bashkohuni me studentët – të gjithë një” dhe do të nisë në ora 16:30 pranë Urës së Gurit në Shkup.
Mbështetje për këtë organizim ka dhënë edhe Parlamenti Studentor i Universiteti i Prishtinës, i cili u ka bërë thirrje studentëve dhe qytetarëve që të solidarizohen me protestën. /teve1.info/
