Është një ndër vendet më të bukura që ka Kosova.
E rruga për të ardhur deri këtu vazhdon të sjell telashe për turistët.
Nga Podujeva mori rrugën për tek Ujëvarat e Mirushës.
Enver Munishi shprehet i pakënaqur sa i përket infrastrukturës.
“Infrastruktura duhet me patjetër, rrugën, parkingun edhe këtë rrugën e shkurtër prej parkingut deri këtu iu kisha propozu që me investu pak dhe me ua bë të mundshme njerëzve me aftësi të kufizuara për me ardhë”, tha qytetari.
E Skender Krasniqi zgjodhi që këtë ditë të kalojë me miq nga Londra.
Ai kërkon që në këtë vend të investohet më shumë.
“Është shumë e keqe rruga nuk është ndërmarrë asgjë për me ardh deri këtu as nuk ka shenja treguese për rrugë dhe rruga është katastrofë, ky vend është i mrekullueshëm dhe duhet të bëjnë sa më shumë që me pas turista”, tha Skender Krasniqi, qytetar.
Ndërsa edhe qytetarët tjerë që vizituan për herë të parë këtë atraksion turistik, u shprehen të zhgënjyer.
“Hera e parë që e vizitoj këtë vend, këtu mirë nuk është keq por kishte pak vështirësi rrugës nuk kishte tabela orientuese, rruga ishte pak e keqe në përgjithësi mirë”, tha Xhevdet Tahirukaj, qytetar.
Rreth dy muaj më parë, zëvendësministri i Infrastrukturës Hysen Durmishi dhe kryetari i Komunës së Malishevës Ekrem Kastrati nënshkruan memorandum mirëkuptimi për financimin e rrugës që të shpie tek Ujëvara e Mirushës në vlerë prej rreth 700 mijë euro.
Pavarësisht mungesës së zhvillimit të infrastrukturës, kjo nuk ndalon që Ujëvarat e Mirushës të vizitohen çdo ditë nga turistët.
Ujëvarat e Mirushës shtrihen në territorin e tri komunave, Rahovec, Klinë dhe Malishevë.
