Nënkryetarja e Kuvendit të Kosovës nga PDK, Vlora Çitaku, ka reaguar lidhur me ekspozitën “Masakrat në Kosovë 1998–1999”, duke theksuar se një kërkim-falje nuk është i mjaftueshëm për gabimet e evidentuara, si dhe ka kërkuar kërkuar hetim të plotë institucional.
Sipas saj, pasaktësitë e paraqitura në ekspozitë cenojnë drejtpërdrejt ndjenjat e familjarëve të viktimave dhe dëmtojnë të vërtetën historike për luftën në Kosovë.
Ajo përmendi në veçanti rastin e masakrës së Dubravës, duke theksuar ndikimin emocional që këto gabime kanë tek familjet e prekura.
Mes tjerash, ajo kërkoi kthimin e mjeteve të ndara për këtë projekt dhe paralajmëroi se rasti nuk duhet të mbyllet pa një hetim të detajuar.
“Nga pasaktësitë që u pa në ekspozitë, në raste të tilla kërkim falja nuk mjafton. Unë vetëm mund ta marr me mend se si janë ndjerë familjarët e viktimave të masakrës famëkeqe të Dubravës, nëna ime e ka një të vrarë aty. Ka pasur pasaktësi edhe të tjera por kjo ndikon në narracionin dhe të vërtetën historike. Këtu nuk duhet të përfundojë hetimi. Kërkesa ka ardhur nga organizata Integra, kërkesa i është drejtuar kryetares së Kuvendit pastaj ajo e ka ndarë më ne”, deklaroi ajo.
Duke folur për zhvillimet politike, Çitaku bëri të ditur se deri më tani nuk kanë marrë ndonjë ftesë nga kryeministri për konsultime lidhur me çështjen e zgjedhjes së presidentit, duke shtuar se qëndrimi i tyre do të varet nga përmbajtja dhe forma e një ftese të mundshme.
