Të mërkurën publikuan një fotografi në rrjetin social Facebook.
Në këtë formë, Presidenca e Kosovës, e bëri të ditur se shefja e shtetit ndodhet në Shtetet e Bashkuara të Amerikës.
Kjo për të zhvilluar një takim me zyrtarin e lartë të Departamentit Amerikan të Shtetit, për çështjet evropiane dhe të euroazisë, Luis Bono.
Nga presidenca e Kosovës, kanë bërë të ditur se Osmani do të marrë pjesë edhe në Lutjet Nacionale të Mëngjesit në Uashington.
“Presidentja e Republikës së Kosovës, Vjosa Osmani me ftesë të një grupi kongresistësh amerikanë, udhëtoi për në Washington, D.C., për të marrë pjesë në Lutjet Nacionale të Mëngjesit si dhe për të mbajtur fjalim në njërën nga ngjarjet kryesore të këtij organizimi të Kongresit amerikan, thuhet nga Presidenca.
Por, duket se këto nuk do të jenë takimet e vetme qe Osmani do t’i zhvillojë në Uashington.
“Gjatë qëndrimit në Uashington, Presidentja Osmani do të zhvillojë gjithashtu takime me kongresistë amerikanë dhe zyrtarë të administratës së SHBA-së, me fokus në forcimin e partneritetit strategjik ndërmjet Kosovës dhe Shteteve të Bashkuara të Amerikës, si dhe avancimin e aspiratave euroatlantike të vendit tonë”, thuhet tutje.
E sipas njohësve të çështjeve politike, vizitat e krerëve shtetërorë të Kosovës në SHBA në këtë kohë, janë të rëndësishme.
“Kjo vizitë në Departamentin e Shtetit, pavarësisht pse nivelet nuk janë aq të larta, kemi të bëjmë me një zyrtar të Byrosë për Evropën dhe Euroazinë, i cili në një formë ose tjetrën e ka një njohje për shtetet e Ballkanit, në këtë rrafsh është jashtëzakonisht e mirë, krijimi i kanaleve dhe raporteve të reja me Administratën Trump”, ka vlerësuar politologu Albinot Maloku.
Ndryshe, emisari i SHBA-ve për Misione të Posaçme, Richard Grenell, të martën shkroi se SHBA-së i duhen partnerë të besueshëm në Ballkan.
Ndërsa sipas tij, Qeveria aktuale e Kosovës nuk është e tillë.
