Ministri i Shëndetësisë, Arben Vitia ka vizituar sot Klinikën e Kirurgjisë Abdominale dhe Urologjisë, ku gjatë takimeve me udhëheqësit e tyre, temë diskutimi ishte rritja e kapaciteteve shëndetësore dhe përmirësimi i shërbimeve.
Gjatë kësaj vizite, ministri Vitia bëri të ditur se dikasteri që ai udhëheq do të shtojë investimet në mënyrë që të ngritet cilësia e shërbimeve për qytetarët, përcjell teve1.info
“Na duhet raport i shfrytëzimit racional të resurseve humane. Çdo kërkesë duhet të ketë një arsyetim, ngaqë na duhet analizë e situatës në raport me kërkesat për infrastrukturë, pajisje dhe staf shtesë. Gjë që e kam kërkuar si raport edhe nga Bordi dhe udhëheqësja e SHSKUK-së. Mistria e Shëndetësisë do të shtojë investimet me qëllim të ngritjes së kapaciteteve dhe cilësisë së shërbimeve për qytetarët. Rekrutimet e profesionistëve shëndetësorë që janë në procedurë do të plotësojnë nevojat dhe kërkesat e Klinikave në QKUK me qëllim të realizimit të objektivit për ta rritur performancën dhe cilësinë e shërbimeve shëndetësor”, ka thënë ai.
Vitia ka potencuar se duhet adresuar të gjitha mangësitë e identifikuara.
“Synimi ynë është i përbashkët që të trajnojmë specialistët, si dhe të shtojmë numrin e intervenimeve operative. Do të bëhen investime në infrastrukturë, ku përveç filtrit të sallava duhet të ofrohen kushte dinjitoze për stafin dhe pacientët. Tashmë e kam nënshkruar një dokument në vlerë prej 41 milionë eurove që do të jenë shërbim të infrasktrurës dhe avancimit të kushteve të punës”, është shprehur ai, bëhet e ditur në njoftimin e MSH-së.
Në njoftim theksohet se nga ana e tyre, udhëheqësit e klinikave e falënderuan Vitinë për përkushtimin që bashkërisht të përmirësohen shërbimet shëndetësore në klinikat përkatëse. /Teve1.info/
