Ministri i Shëndetësisë, Arben Vitia ka thënë se Qeveria e Kosovës ka nisur të bëjë veprime të rëndësishme për ndryshimin e gjendjes në shëndetësi, ku ka përmendur Ligjin e Pagave, që sipas tij për herët të parë pas luftës mjekëve u ofrohet paga dinjitoze.
“Qeveria ka filluar me veprime të rëndësishme për ndryshimin e gjendjes në shëndetësi, duke filluar me miratimin e Ligjit për Pagat, ku mjekëve për herë të parë pas luftës, konsideroj se u jepet rëndësia që ata e kanë dhe pagesa më dinjitoze, për të vazhduar me investime në infrastrukturën shëndetësore”, tha Vitia, thuhet në komunikatën e MSH-së.
Ai këto deklarime i bërë në Kuvendin e Odës së Mjekëve të Kosovës, ku tha se mbetet i hapur për bashkëpunim me mjekët me qëllim të avancimit të sistemit shëndetësor publik në vend.
Vitia i falënderoi mjekët për kontributin e dhënë në sistemin shëndetësor, në mënyrë të veçantë në vitet e fundit gjatë ballafaqimit me pandeminë COVID-19.
Nga ana e tij, kryetari i Odës së Mjekëve, Pleurat Sejdiu, falënderoi Ministrin Vitia për praninë në Kuvendin e Odës së Mjekëve dhe shtoi se do të jenë aleat të Ministrisë së Shëndetësisë ngaqë shëndeti publik është interes i përbashkët./teve1.info/
