Pavarësisht kontributit në luftë, Selver Lladrovci nuk e gëzon pensionin e veteranit.
Madje ai vuan nga sëmundje të cilat ia pamundësojnë të punojë për familjen e tij.
Si pasojë nuk ka as shtëpi, ndërsa parat për qira me vështirësi po i siguron.
Lladrovci që ishte i ushtar i “Brigadës 114 Fehmi Lladrovci”, për 22 vite kishte jetuar në Obiliq por që nga aty e kanë larguar.
“Kam jetu 22 vite në Obiliq, na kanë mashtru, na kanë largu prej Obiliqit, e kanë bërë park aty, kam jetu në kushte të vështira edhe atje. 22 vite kam udhëtu Obiliq- Prishtinë në këmbë për me shku, kam punu në Ferronikel për me ia ba fëmijëve një kafshatë të gojës. Tash jam metë me qira qitu, qe dy vjet jam me qira, e treta banesë është kjo që po e ndërroj”, shprehet Lladrovci.
E sikur të mos i mjaftonin kushtet e vështira, Lladrovci ka edhe probleme shëndetësore.
Gruaja e tij, e cila vuan nga sëmundja e Spendulozës, shpreh zhgënjimin ndaj Komunës së Obiliqit.
“Pse burri jem mos me pas një ndihmë për një strehim. Sikur të kishim pas na tokë, e buxhet të madh, na s’kishim jetu në shtallë të lopëve”, shprehet ajo.
Ajo ka një lutje për të gjithë ata që mund t’i ndihmojnë.
E sa i përket mundësisë së përfitimit të një banese, nënkryetari i komunës së Obiliqit, Ibush Mjekiqi thotë se Komisioni do të shqyrtoj të gjitha kërkesat dhe do të vendosë.
Për këtë banesë, familja Lladrovci paguan qira mujore 130 euro, e të cilat vështirë po i siguron.
Kronika e realizuar nga Albiona Hajdari
