Operatorët kryesorë në vend, kanë siguruar mbulim të plotë në të gjithë territorin e Republikës së Kosovës, përfshirë edhe veriun e vendit. Këtë për Tëvë1 e kanë bërë të ditur nga Autoriteti Rregullativ i Komunikimeve Elektronike dhe Postare. Nga ARKEP kanë zbuluar edhe sa është shkalla e mbulueshmërisë në Kosovë me rrjetet 2G, 4G+ dhe atë 5G.
Në muajin gusht, hapi degën më të re.
Kështu Posta e Kosovës u bë me një pikë edhe në Mitrovicën e Veriut.
Kjo ishte dega e parë që u hap në këtë pjesë të vendit, që nga viti 1999.
E ka dy dekada që në komunat veriore, operonin kryesisht operatorët serb.
Por në vitet e fundit shtrirja e rrjeteve mobile në veri të Kosovës, ka bërë përparime të rëndësishme.
Këtë e bën të ditur për Tëvë1, nga Autoriteti Rregullativ i Komunikimeve Elektronike dhe Postare.
“Lidhur me pyetjet e parashtruara, ju njoftojmë se shtrirja e rrjeteve mobile në veri të Kosovës ka bërë përparime të rëndësishme në vitet e fundit. Telekomi i Kosovës dhe IPKO, si dy operatorët kryesorë në vend, tashmë kanë siguruar mbulim të plotë në të gjithë territorin e Republikës së Kosovës, përfshirë edhe veriun e vendit. Ky zhvillim ka përmirësuar ndjeshëm qasjen në shërbimet mobile, duke mundësuar lidhje të qëndrueshme dhe shpejtësi të lartë interneti për qytetarët dhe bizneset në këtë rajon”, thuhet nga ky institucion.
Nga ARKEP thonë se në territorin e Kosovës, përfshirë edhe veriun e vendit, janë të disponueshme edhe rrjetet 4G+ dhe 5G.
Ndërsa kanë treguar edhe shkallën e mbulueshmërisë.
“Aktualisht, territori i Republikës së Kosovës është e mbuluar me rrjetin GSM (2G) ne shkallen 98%, respektivisht rrjetin LTE (4G) me mbi 90% dhe rrjetin 5G rreth 70%”, thuhet nga ARKEP.
Por, sipas ish-kryeshefit ekzekutiv të Postës së Kosovës Xhevdet Smakiqit, kjo nuk nënkupton përmbushjen të detyrimeve ligjore për ofrimin e shërbimeve bazike për qytetarët pa dallim.
“Shtrirja në kuptimin teknik nuk nënkupton edhe ofrimin apo marrjen e shërbimeve nga komuniteti jo-shumicë në Kosovë e shumicë në veri, pra serbët e Kosovës”, thotë ai.
Smakiqi thotë se antenat e para të Telekomit të Kosovës në veri, u vendosen qysh në vitin 2008.
“Nuk është e vërtetë që tani për herë të parë është shtrirë rrjeti teknik i Vala-s, për arsye se nga viti 2008-2009 në Telekomin e Kosovës ka ekzistuar departamenti për integrimin e komunitetit serb, ka qenë edhe ish-deputeti i Kuvendit të Kosovës, Slavisha Petkoviq ku ka qenë drejtor dhe i kemi pas vendos antenat në veri të Kosovës dhe ka pasur shtrirje teknike por megjithatë ka ekzistuar edhe operatori ilegal i Serbisë në atë pjesë të territorit të Kosovës”, shprehet Smakiqi.
Ndryshe nga ARKEP po ashtu kanë thënë se operatorët po punojnë vazhdimisht për të përmirësuar kualitetin e shërbimeve për qytetarët duke investuar ne rrjetat e gjeneratave të fundit.
