Nga 21 korrik deri më 21 gusht do të jetë pushim bllok në sistemin gjyqësor, e po ashtu njëjtë do të veprohet dhe nga 24 dhjetori deri më 8 janar për periudhën dimërore.
Ky vendim është miratuar në mbledhjen e Këshillit Gjyqësor të Kosovës, ku aty përjashtohen kujdestaritë lidhur me trajtimin e lëndëve me prioritet ligjor dhe rastet emergjente.
Muaji qershor, korrik dhe fundi i dhjetorit e fillimi i janarit po konsiderohen problematik për organizim të punës për shkak të fluksit të madh të pushimeve nga stafi.
Këtë vendim të KGJK-së po e sheh si të dobishëm avokati, Asdren Bytyqi.
“Është krijuar një kaos ndër vite në duke humbur efektiviteti i trajtimit të lëndëve ashtu që gjyqtarët disa marrin në pushim në fillim të korrikut, pastaj disa në gusht disa i kompensojnë muajt tjerë dhe rrjedhimisht bëhet një lloj pasigurie edhe e caktimit të lëndëve, kjo padyshim që është e duhur sepse do ta kanë një mundësi brenda të cilit mund të marrrin pushim dhe në realitet kanë pushim, pushim pa pagesë dhe pastaj të njëjtën nuk mund ta kompensojnë në muajt tjerë. Kjo natyrisht është në dobi edhe të avokatëve, është në dobi edhe të prokurorëve”, shprehet Bytyqi.
Sipas tij, mungesa e një praktike të tillë në të kaluarën iu ka shkaktuar vështirësi në kryerjen e punës.
“Sepse disa gjyqtarë janë në pushim, disa caktojnë seanca në gusht, disa në korrik, pastaj avokatët duhet të dërgojnë kërkesa dhe të tregojnë që janë jashtë pushimeve, shpesh ato mirren për bazë, shpesh s’mirren për bazë. Ka një lloj pasigurie se mos po humbin lëndët, po na u rrëzohen lëndët”, thotë ai.
Por ndryshe mendon, avokatja Lindita Rexha e cila thotë se nuk e ka pritur mirë këtë vendim.
“Gjykatat tek ne janë të ngarkuara me lëndë shumë tëmdhaja, me raste me numër shumë voluminoz të lëndëve dhe mendoj që një pushim kaq i gjatë verës dhe gjatë dimrit do ta prolongonte edhe më shumë punën e Gjykatave. Ju jeni në dijeni që KGJK viteve të fundit ka bërë reforma sa i përket rekrutimit të gjyqtarëve të rinj, të bashkëpunëtorëve, zyrtarëve në mënyrë që ta rrisë efikasitetin e punës së Gjykatave”, vlerëson ajo.
Ajo shtoi se nuk pret që kjo të rishikohet, pasi është një provë për të parë efektshmërinë në punë të saj.
