Katër ish zyrtarë të Ministrisë së Infrastrukturës, janë liruar nga akuzat për korrupsion nga Gjykata Themelore në Prishtinë të martën.
Ish – ushtruesi i detyrës së drejtorit të Prokurimit Publik në MI, Betim Reçica, dhe tre zyrtarët, Isa Berisha, Leonora Limani dhe Mirdit Emini, atëherë pjesë e komisionit vlerësues për tenderin për ndërtimin e autoudhës së Gjilanit, sipas aktgjykimit të së martës, nuk iu provua fajësia.
“Nuk është provuar se të akuzuarit kanë kryer verpat penale për të cilat akuzohen me aktakuzë. Andaj të njëjtit lirohen nga akuza”, tha ne fjalën e tij, kryetari i trupit gjykues Musa Konxheli.
Ndaj Reçicës rëndojnë akuzat për “Ushtrim ndikimi”, “Shpëlarje parash”, dhe “Keqpërdorim të autoritetit zyrtar”.
Kurse, Isa Berisha, Leonora Limani dhe Mirdit Emini akuzohen për “Keqpërdorimi i detyrës apo autoritetit zyrtar”.
“I pandehuri Betim Reçica, i akuzuar për “ushtrim ndikimi”, nuk është provuar se ka kryer këtë verpër penale. Po ashtu, i akuzuari Betim Reçica, është akuzuar se ka kryer veprën “keqpërdorim i pozitës apo autoritetit zyrtar”, nuk është provuar kryerja e kësaj vepre penale, tha Konxheli
Sipas aktakuzës së ngritur nga Prokuroria Speciale më 15 shkurt 2021, Betim Reçica akuzohej se si ushtrues i detyrës së drejtorit të Prokurimit Publik në Ministrinë e Infrastrukturës gjatë vitit 2017, me qëllim të përfitimit financiar për kompaninë “Gjoka Konstruktion”, ushtroi ndikim të drejtpërdrejtë te Isa Berisha, kryetar i Komisionit Rivlerësues dhe Leonora Limani e Mirdit Emini, anëtarë të këtij komisioni, që ishin vartës të tij, duke i vënë në presion kohor që rivlerësimin e tenderit për ndërtimin e Autoudhës së Gjilanit ta kryejnë për 10 ditë.