Ilaz Salihu është ulur pas vëllaut të tij, Besnikut.
Por, të dy bashkë, ndodhen në një aktakuzë të përbashkët për vrasjen e kushëririt të tyre, Salih Salihu.
Në seancën e së martës, Ilaz Saliu, dha mbrojtjen e tij.
Ai u ballafaqua nga prokurorja e rastit me një deklaratë të dhënë më herët në polici.
Mirëpo, i akuzuari deklaroi se nuk qëndron pas asaj që rrëfeu në Polici, pasi tha se aty kishte qenë i kërcënuar.
Tutje prokurorja ia përmendi edhe një deklaratë tjetër, ku Ilazi kishte shprehur siguri se vrasësi i Salih Salihut, ishte vëllau i tij.
Edhe vërtetësia e kësaj deklarate, u mohua.
Ilaz Salihu thotë se hetuesit kishin marrë para që fajin t’ua linin atij dhe vëllaut të tij.
Në lidhje me pretendimet për kërcënim nga ana e policisë, pyetje pati edhe i akuzuari tjetër, Besnik Salihu.
Tutje, i akuzuari tregon edhe për disa fjalë që ia kishte thënë vajza e kushëririt të tyre, Salih Salihut, pak ditë pas ngjarjes.
Kur gjithçka erdhi në fazën e fjalëve përfundimtare, pati një përplasje verbale mes Besnik Salihut dhe avokatit të tij, i cili është i caktuar sipas detyrës zyrtare.
Kjo solli tërheqjen e avokatit nga mbrojtja e të akuzuarit.
Sipas aktakuzës së Prokurorisë, më 26 shtator 2023, në fshatin Dumnicë e Epërme në Podujevë, pas një mosmarrëveshje Besnik Salihu ia mori jetën me armë zjarri Salih Salihut.
Prokuroria ngarkon Ilaz Salihun me veprën penale “ndihmë në vrasje e rëndë”.
