Naser Rugova, anëtar i Lidhjes Demokratike e Kosovës ka thënë se kryeministri i Kosovës, Albin Kurti po taktizon me opozitën.
Ai ka thënë se Kurti “po e luan lojën e tij” duke parë që opozita nuk janë të unifikuar.
“Kurti po taktizon me opozitën, sepse e di që opozita nuk e ka një apo dy emra konsensual. Duke parë që kjo opozitë është e përçarë, nuk komunikojnë , nuk koordinohen mes vete dhe nuk kanë emra, atëherë Kurti po fton një nga një, me maksimën ‘përçaj dhe sundo”. Kurti po e luan lojën e tij më të mirë të mundshme”, ka thënë Rugova në emisionin “InfoNata” në Tëvë1.
Ai si taktikë e ka vlerësuar edhe deklaratën e Kurtit se duhet marrëveshje që siguron 84-85 deputetë, pas takimit me Abdixhikun.
“Këtu ishte taktika e tij, atëherë pse po e fton kryetarin e LDK-së në takim”, tha anëtari i LDK-së.
Por, ai vlerëson se Kurti po dëshiron zgjedhje.
Rugova ka folur edhe për takimet që kreu i LDK-së, Lumir Abdixhiku po i zhvillon me Kurtin për çështjen e presidentit.
Ai ka thënë se Abdixhiku duhet të propozojë një ose dy emra për president.
“Unë e inkurajon kryetarin e Lidhjes Demokratike të Kosovës, që thjeshtë të dal me një ose dy emra, sepse LDK ka mjaft njerëz të cilët në mënyrë dinjitoze do ta ushtronin detyrën e të parit të shtetit”, ka thënë Rugova.
