Skuadra e Vëllaznimit është rikthyer te fitorja në Superligën e Kosovës në basketboll.
Pas dy humbjeve rresht, Vëllaznimi e ka mposhtur Bashkimin në ndeshjen e fundit të xhiros së 23-t të Superligës së Kosovës në basketboll.
Të enjten mbrëma, në palestrën “Shani Nushi” në Gjakovë, skuadra e Vëllaznimit triumfoi me shifrat 84:78.
Me këtë fitore, Vëllaznimi mbetet i pesti në tabelë me 33 pikë, dy më shumë se Bashkimi që zë vendin e gjashtë dhe regjistroi humbjen e dytë rresht në kampionat. Skuadra gjakovare i fitoi dy çerekët e parë dhe krijoi epërsi që i mundësoi fitoren ndaj Bashkimit edhe pse ekipi nga Prizreni triumfoi në dy periudhat e fundit.
Jalen Ray me 25 pikë dhe Craig Osaikwuwuomwan me 16 pikë ishin më të dalluarit te Vëllaznimit, ndërsa te Bashkimi u veçua Altin Morina me 22 pikë të realizuara.
