Lulzim Veliu, njohës i marrëdhënieve ndërkombëtare, ka thënë se dështimi i seancave për konstituimin e Kuvendit që të enjten ishte tentativa e 27-të, është rezultat i papërgjegjësisë të partive politike dhe deputetëve të zgjedhur.
Ai ka thënë se deputetët e zgjedhur më këto veprime po tregojnë se nuk e kanë në interesim qytetarin dhe shtetin, por vetëm privilegjet e tyre.
Veliu në emisionin “Këndi i Debatit” në Tëvë1, ka thënë se diskutimi që të ketë zgjedhje të reja tregon papërgjegjësi totale.
“Aq të papërgjegjshëm sa që diskutojnë mundësinë e mbajtjes së zgjedhje të parakohshme për ta shtyrë këtë kaos deri në vjeshtë, dhe kësaj nuk mund t’i thuhet ndryshe vetë, papërgjegjësi totale. Deputetët e Kuvendit të Kosovës nuk i shohë ndryshme vetëm se kanë ardhur për përfitime personale dhe nuk shohin asnjë pikë përgjegjësie për çfarë janë votuar. Atyre nuk u intereson interesi i qytetarëve, i shtetit, por vetëm interesi personal”, ka thënë ai.
Veliu i cili jeton në Gjermani ka kujtuar si ky vend mbajti zgjedhjet dy javë pas atyre në Kosovë dhe se sot kancelari i këtij vendi u takua me presidentin amerikan Trump, ndërsa siç ka thënë ai Kosova ende nuk e di kë do ta ketë kryeparlamnetar.
