Një punëtor ka humbur jetën pasi dyshohet se ka rënë në kontakt me energjinë elektrike, të mërkurën në Obiliq.
Viktima fillimisht ishte dërguar me urgjencë në Qendrën Klinike Universitare të Kosovës, por mjekët atje kanë konstatuar se ai kishte ndërruar jetë.
Sipas Policisë së Kosovës, viktima po punonte pranë një mikseri betoni në momentin kur dyshohet se është goditur nga rryma elektrike.
Me urdhër të prokurorit kujdestar, trupi i pajetë është dorëzuar familjes për ceremoninë mortore.
“Raportohet se viktima mashkull kosovar, derisa ka qenë duke punuar afër mikserit të betonit, dyshohet se ka pasur kontakt me rrymën. Si pasojë i njëjti ka pësuar lëndime trupore dhe është dërguar në QKUK, mirëpo nga stafi shëndetësor është konstatuar se i njëjti është pa shenja jete. Me vendim të prokurorit, trupi i pajetë u është liruar familjarëve”, thuhet në raportin e PK-së. /teve1.info/
