Një grua ka vdekur në Australi dhe mijëra janë detyruar të largohen nga shtëpitë e tyre pas reshjeve të rrëmbyeshme që shkaktuan përmbytje në veri të Queensland.
Autoritetet paralajmërojnë për përkeqësim të reshjeve dhe për një situatë që mund të jetë “e rrezikshme dhe kërcënuese për jetën.”
Më shumë se 1,000 mm shi ka rënë në pjesë të verilindjes së Queensland që nga e premtja me “reshje rekord” që do të vazhdojnë të hënën, sipas kreut të shtetit të Queensland, David Crisafulli.
Meteorologët thonë se këto mund të jenë përmbytjet më të këqija në rajon në më shumë se 60 vjet.
Gruaja që vdiq ishte në bordin e një gomone të Shërbimit të Emergjencave Shtetërore (SES) e cila goditi një pemë dhe u përmbys në qytetin Ingham, në veriperëndim të Queensland, raporton BBC.
Grupi Lokal i Menaxhimit të Fatkeqësive në Townsville thotë se 1700 shtëpi në qytet mund të përmbyten – disa deri në katin e dytë – ndërsa nivelet e lumenjve rriten.
Mijëra njerëzve në gjashtë periferi të Townsville iu tha të largoheshin nga shtëpitë e tyre deri në mesditë të dielën, por zyrtarët thonë se rreth 10% e banorëve kishin zgjedhur të qëndronin.
Të njëjtat zona u goditën rëndë gjatë përmbytjeve të vitit 2019.
Ndërkohë aeroporti i Townsville është i mbyllur deri të hënën në mëngjes, supermarketet kanë mbetur pa ushqime të freskëta dhe mijëra shtëpi janë pa energji, duke përfshirë Ingham dhe komunitetin indigjen të Palm Island.
