Ka vdekur një 22-vjeçar në Gjilan, pasi i njëjti dyshohet se ka rënë nga dritarja e banesës së tij.
Lajmin për teve1.info, e ka konfirmuar zëdhënësi i policisë për rajonin e Gjilanit, Ismet Hashani.
“Sot me datë 08.08.2023 rreth orës 15:54 Policia e Kosovës në Gjilan është njoftuar se në rr. “Abdulla Presheva” – Gjilan është gjetur një person i shtrirë në rrugë në gjendje të rëndë shëndetësore. Viktima ( M.K.SH 22 vjeçar) dyshohet të ketë rënë nga dritarja e banesës së tij”, u shpreh Hashani.
Hashani bëri të ditur se përkundër përpjekjeve të mjekëve për t’i ofruar ndihmë, përsëri ky i fundit ka ndërruar jetë, raporton teve1.info.
“Në vendin e ngjarjes kanë dal njësitet relevante nga stacioni policor i Gjilanit dhe Hetuesit rajonal të policisë së Kosovës. Rrethanat se si ka ardhur deri te ky rast i rëndë janë duke u hetuar nga policia e Kosovës në bashkëpunim me prokurorin e shtetit. Prokurori ka urdhëruar që trupi i viktimës të dërgohet në IML në Prishtinë, dhe rasti është cilësuar “Vdekje e dyshimtë”, është shprehur tutje Hashani.
