Presidentja e Kosovës, Vjosa Osmani, ka thënë se Kosova është vend me bukuri të jashtëzakonshme vetëm se ato duhet të ruhen dhe promovohen, raporton teve1.info
Osmani këto deklarime i bëri gjatë hapjes së Panairit të Turizmit që do të mbahet për tri ditë në Prishtinë ku po marrin pjesë mbi 200 kompani vendore e të huaja.
“Turizmi kontribuon në ngritjen e ekonomike të shtetit. Sot turizmi si industri krijon vende të shumta të punës dhe të ardhura për qytetarët. Kultura është një aspekt thelbësor i turizmit. Turizmi kulturor kontribuon në ruajtjen e traditave dhe kulturës sonë. Ky panair ka mbledhur kompani të ndryshme, kjo është tejet fituese jo vetëm për komunat por edhe për të tjerët. Pozita gjeografike e Kosovë ia mundëson pozitën për një turizëm të mirë. Kosova nuk është më pak e bukur se vendet e tjera, në fakt ka bukuri të jashtëzakonshme vetëm ne duhet t’i mbrojmë dhe ti promovojmë. Duhet të synojmë që Kosovën ta bëjmë pjesë të paketave jo vetëm të Ballkanit por edhe të Evropës”, tha ajo.
Ndërsa kryetari i Unioni i Turizmit të Kosovë, Baki Hoti, tregoi për qëllimin e këtij panairi.
Ai tha se pjesëmarrës janë më shumë se 200 kompani vendore e ndërkombëtare.
“Kemi arrit që më në fund edhe Kosova të ketë një panair të përmasave të tilla me mbi 200 kompani vendore e të huaja. Qëllimi kryesor është që të bëhet promovimi i turizmit, traditave tona, i vlerave tona. Mendoj që kemi bërë një punë të mirë. Mbi 200 kompani nga 10 shtete”, tha ai.
Kryetari i Komunës së Prishtinës Përparim Rama, tha se do ta ketë në fokus ngritjen e kapaciteteve të turizmit.
“Jemi të nderuar që po e hapim këtë panair në Prishtinë. Qyteti ynë është i nderuar më një tubim kaq madhështor dhe shpresojmë që ky panair të shërbej që të eksploroni atë që ne e ofrojmë. Me pjesëmarrjen me mbi 200 kompani me 10 vende evropiane. Fokusi primar i panairit është promovimi i turizmit të Kosovës. Dua me përmend se fokusi primar është edhe ngritja e kapacitetit të turizmit. Kosova po përparon në këtë drejtim”, tha ai.
Për tri ditë më radhë në Prishtinë do të mbahet edicioni i dytë i Panairit Ndërkombëtar të Turizmit, i organizuar nga Unioni i Turizmit të Kosovës.
Në këtë panair po marrin pjesë më shumë se 200 kompani të turizmit me ofertat e tyre.
Sipas organizatorëve, qëllimi kryesor i këtij panairi është promovimi i turizmit dhe traditave kosovare.
