Ministrja në detyrë e Ekonomisë, Artane Rizvanolli ka reaguar pas kërkesës që LDK-ja ka dorëzuar në ZRrE ku ka kërkuar anulimin e vendimit për rritjen e tarifave të energjisë elektrike.
Ajo në një reagim ka thënë se vendime e ZRrE-së nuk anulohen me nënshkrime e me deklarata boshe, por me vendim të gjykatës.
Sipas saj, LDK po të kishte brengen e qytetarëve nuk do të bllokonte formimin e institucioneve.
“Për LDK-në, dhënia e milionave të taksapaguesve bizneseve të mëdha – siç kanë bërë edhe gjatë pandemisë – edhe mund të jetë politikë e dëshiruar, por atë mund ta realizojnë veç nëse i fitojnë zgjedhjet ndonjëherë. LDK e di shumë mirë se vendimet e ZRrE-së si institucion i pavarur nuk shtyhen as anulohen me nënshkrime e me deklarata boshe, të askujt. Ato mund të sfidohen vetëm në Gjykatë. Por ata kanë zgjedhur cirkun për publikun në vend të substancës. Po të brengoseshin për qytetarët, nuk do të bllokonin konstituimin e Kuvendit, duke pamundësuar kështu edhe raportimin e ZRrE-së në Kuvend”, ka shkruar ajo në Facebook.
Rizvanolli i ka bërë thirrje ZRrE-së të analizojë shkaqet e rritjes së madhe të kostos me furnizim me energji gjatë vitit 2024.
“ZRrE, në vend se të merret me politika qeveritare, bën mirë të shfrytëzojë kohën të analizojë në mënyrë të detajuar shkaqet e rritjes aq të madhe të kostos së furnizimit me energji gjatë vitit të kaluar, përfshirë 10-fishimin e tarifave të transmisionit, dhe nëse këto kanë mundur të evitohen – siç u kam kërkuar edhe përmes komenteve, edhe gjatë takimit në procesin konsultativ. Kjo duhet të jetë tema e parë që Komisioni parlamentar i ardhshëm për Ekonomi do ta trajtojë”, ka shkruar ajo.
Rizvanolli ka thënë se me Qeverinë Kurti 2 e as sipas saj me Qeverinë 3 se vendime për dhënie të “veç 50 milionë eurove” të taksapaguesve për të subvencionuar konsumin e energjisë elektrike të 1%-shit të korporatave më të fuqishme që operojnë në Kosovë, nuk do të ketë”./teve1.info/
LDK-ja e dorëzon në ZRrE kërkesën që të anulohet rritja e çmimit të rrymës
